LEGAL TIPS PARA SA MGA MAGBABAKASYON NGAYONG SEMANA SANTA AT SUMMER IBINIGAY NG CIA WITH BA

Legal tips para sa mga magbabakasyon ngayong Semana Santa at summer, ibinigay ng ‘CIA with BA’

Habang papalapit ang Semana Santa at summer break, marami na ang nagpaplano ng kanilang bakasyon. Sa isang episode ng ‘CIA with BA’, sinagot ng mga legal expert ang ilang tanong ng mga manonood tungkol sa kanilang karapatan at obligasyon sa panahon ng bakasyon.

Isa sa mga nagtanong ay si Ross mula sa Maynila: “Pupunta po kami sa beach ng mga kaibigan ko. Since lahat kami ay mga estudyante at may student ID naman, pwede po ba naming gamitin ang student fare discount ngayong summer sa pagbili ng bus tickets?”

Ayon kay Atty. Matt Cesa, valid pa rin ang discount: “Under sa memorandum ng LTFRB, pati na rin ‘yung recent law natin on student discount, ang nakalagay kasi, entitled ka dito sa discount na ‘to mula Monday to Sunday, kahit holiday, sembreak, o summer break.”

Dagdag pa niya, ang mga post-graduate students tulad ng mga nag-aaral ng medisina, batas, o kumukuha ng master’s o doctorate degree ay hindi sakop ng diskwento.

Nagpadala rin ng tanong si Daniel mula sa Quezon City tungkol sa pag-extend ng family vacation niya: “Pwede ko po bang gamitin ang service incentive leave para tuluy-tuloy at hindi mabitin ang aking bakasyon?”

Sagot ni Atty. Rafael Rivera: “Pwede, basta nabigyan ka na ng employer mo ng service incentive leave. Ang batas, hindi nagsasaad ng partikular na dahilan para gamitin ito. As long as paalam ka sa employer, puwede mo siyang gamitin.”

Samantala, si Edgar mula sa Baler, Aurora, na unang beses pa lang magta-travel abroad, nagtanong: “Ano po ang aking gagawin sakaling mawala ang aking passport?”

Payo ni Atty. Bernadette Maybituin, huwag mag-panic at sundin ang tamang proseso:

1. Mag-report agad sa pinakamalapit na police station.
2. Gumawa ng affidavit of loss.
3. Tumungo sa pinakamalapit na embahada o konsulado ng Pilipinas para mag-apply ng bagong passport, emergency passport, o travel certificate depende sa sitwasyon.

Sa segment na “Tanong ng Pilipino,” patuloy ang ‘CIA with BA’ sa pagbibigay kaalaman sa mga manonood tungkol sa kanilang karapatan sa panahon ng bakasyon. Maging handa at may alam—mapa-travel man o staycation.

Ang ‘CIA with BA’ ay ipinagpapatuloy ang legasiya ng yumaong Senador Rene Cayetano at napapanood tuwing Linggo, 11:00 p.m. sa GMA7, na may replays sa GTV tuwing Sabado, 10:30 p.m.