CIA WITH BA : MGA SCREENSHOT MULA SA DUMMY ACCOUNT PWEDENG EBIDENSIYA?

‘CIA with BA’: Mga screenshot mula sa dummy account, pwedeng ebidensya?

Sa panahon ngayon kung saan isang screenshot ay maaaring sirain ang reputasyon, isang tanong ang patuloy na pinag-uusapan: puwede bang maging ebidensya ang screenshot mula sa isang fake o dummy account? Ito ang tinalakay sa segment na “Yes or No” ng programang ‘CIA with BA’ (Cayetano in Action with Boy Abunda).

Ibinahagi ni Manilyn mula sa Mariteam na may nag-akusa sa kanya hindi lamang ng pagpapakulam kundi pati na rin ng pananakit sa aso ng nagrereklamo. Ayon sa kanya, ang tanging ebidensyang ipinakita laban sa kanya ay isang screenshot mula sa isang dummy account.

“Ang pinanghahawakan lang po na ebidensya laban sa akin ay isang screenshot ng isang dummy account,” sabi niya sa segment. “Ngayon, ang question ko po, pwede po ba ‘yon na maging ebidensya laban sa akin?”

Direktang sinagot ni Atty. Marian Cayetano ang kanyang tanong. “Yes,” sabi niya. “‘Yung mga screenshot ng mga text or online messages, pwede kasi siyang maging ebidensya according sa ating rules of electronic evidence na nakasulat sa ating rules of court, admissible siya…”

Ngunit binigyang-diin niya kaagad na ang pagiging admissible ay simula pa lamang. Para maging valid, kailangan mapatunayan ang authenticity ng screenshot at malinaw na maipakita kung saan ito nanggaling.

Dagdag pa ni Atty. Cayetano, ang ebidensya ay hindi dapat edited, fabricated, o minanipula. Kung walang patunay ng pagiging tunay, maliit lamang ang bigat ng screenshot bilang ebidensya.

Sa kaso ni Manilyn, nangangahulugan ito na kailangan munang ma-verify ang screenshot bago ito magamit laban sa kanya, lalo pa’t seryoso ang mga akusasyon.

Ipinakita ng segment kung gaano kahalaga ang pag-intindi sa digital evidence ayon sa batas ng Pilipinas. Maaaring tanggapin ang mga screenshot sa korte, ngunit nakadepende ang kredibilidad nito sa kung paano maipapakita ang pinagmulan at integridad ng ebidensya.

Pinangungunahan nina Senator Alan Peter Cayetano, Senator Pia Cayetano, at Boy Abunda, ang ‘CIA with BA’ ay mapapanood tuwing Linggo, 11:00 p.m. sa GMA7, at may replay sa GTV tuwing Sabado, 10:30 p.m.