CIA WITH BA : SIKRETONG CCTV SA OPISINA LEGAL BA?

CIA with BA’: Sikretong CCTV sa opisina, legal ba?

Ang workplace surveillance ay maaaring magmukhang simpleng hakbang para sa seguridad, ngunit ang paglalagay ng CCTV nang walang tamang abiso ay maaaring magdulot ng seryosong legal na pananagutan sa ilalim ng batas ng Pilipinas.

Naging usapin ito matapos ikuwento ni Aya ng MariTeam ang tungkol sa isang kaibigan na nagbukas ng negosyo at naglagay ng CCTV upang maiwasan ang posibleng pagnanakaw ng mga empleyado.

Dito na itinapat ni Aya ang mahalagang tanong: “Legal po ba na maglagay ng CCTV sa opisina na hindi ipinapaalam sa mga empleyado?”

Ayon kay Atty. Marian Cayetano, ang ganitong gawain ay maaaring lumabag sa Data Privacy Act.

“Actually, pwede talaga siyang maging violation ng Data Privacy Act,” aniya.

Ipinaliwanag niya na obligasyon ng employer na ipaalam sa mga manggagawa ang paglalagay ng CCTV at maaari ring maglagay ng malinaw na abiso.

“Kailangang ipaalam ng employer na may ikakabit siyang CCTV do’n sa kanyang business at pwede ring maglagay ng notification [na nagsasabing] ‘This establishment is equipped by CCTV,’” dagdag niya.

Binigyang-diin ni Atty. Cayetano na mahalaga ang transparency dahil ang CCTV ay kumokolekta ng personal na datos.

“Importante talaga na nano-notify ‘yung mga tao kasi ang CCTV, nag-ga-gather ‘to ng personal data so importanteng alam at hindi nakaka-violate ng privacy,” paliwanag niya.

Samantala, binanggit ni Atty. Rafael Rivera ang pinakabagong circular ng National Privacy Commission na nagsasaad na kinakailangang may signage na nag-aabiso sa lahat at hindi maaaring itago o i-store nang matagal ang CCTV footage.

“Kung sakaling kailangan ‘to gamitin, dapat hingin ito sa may-ari at hindi basta-basta ipo-post [sa social media],” aniya.

Paglilinaw ni Atty. Rivera, bagama’t may karapatan ang mga negosyante na protektahan ang kanilang negosyo, dapat ay may makatwirang layunin ang paggamit ng CCTV.

“May management prerogative din kasi so karapatan ng nagnenegosyo na protektahan ang negosyo niya,” aniya—paalala na ang seguridad ay hindi dapat isinasakripisyo ang karapatan sa privacy.

Ang ‘CIA with BA’ na pinangungunahan nina Senador Alan at Pia Cayetano at ni Boy Abunda ay napapanood tuwing Linggo, alas-11 ng gabi sa GMA7.