‘CIA with BA,’ prayoridad ang kapakanan ng mga anak sa gitna ng paghihiwalay ng magulang
Kapag nagwakas ang isang pagsasama, hindi lang nakaraan ang dapat pagtuunan ng pansin kundi pati ang hinaharap — lalo na para sa mga anak na nadadamay sa sitwasyon.
Sa nakaraang episode ng ‘CIA with BA,’ dumulog si Rose upang humingi ng payo kung paano mapoprotektahan ang kanyang anak sa gitna ng magulong paghihiwalay nila ng kanyang asawang si Omar.
Sa segment na ‘Case 2 Face 2 Face’ noong Pebrero 23, ibinahagi ni Rose na nagwakas ang kanilang relasyon dahil sa paulit-ulit na pambababae ni Omar. Depensa naman ni Omar, mas nauna raw na nagkaroon ng ibang lalaki si Rose, kaya siya nasaktan nang husto at nauwi sa pananakit sa asawa — isang bagay na inamin naman niya.
Nang pinagitnaan ni Senator Alan Peter Cayetano ang kanilang usapan, binigyang diin niya na dapat nilang unahin ang pagmamahal nila sa kanilang anak. Sa halip na magpakalugmok sa mga pagkakamali ng nakaraan, pinayuhan ni Sen. Alan na ituon na lamang nila ang pansin sa kung paano sila magiging mabuting magulang sa kabila ng kanilang paghihiwalay.
Isa sa mga unang kasunduan nila ay ang direktang pakikipag-usap ni Omar sa kanilang mga anak, lalo na sa mga nasa hustong gulang na. Napag-usapan din nila ang kahalagahan ng maayos na pakikitungo at pagbibigay ng sapat na oras sa kanilang mga anak.
Dahil wala namang day-off si Omar sa trabaho, iminungkahi ni Sen. Alan na pumili siya ng dalawang araw sa isang linggo na ilalaan lamang niya para sa kanyang mga anak. Bilang suporta sa kasunduang ito, nangako ang ‘CIA with BA’ na sasagutin ang sweldo ni Omar sa loob ng isang buwan para sa dalawang araw na iyon. Sa ganitong paraan, masisigurong mabibigyan niya ng sapat na oras ang kanyang mga anak nang hindi iniintindi ang aspeto ng pananalapi.
Pumayag naman sina Rose at Omar sa kasunduang ito, umaasang magiging daan ito upang magkaroon sila ng mas maayos na co-parenting arrangement sa kabila ng kanilang paghihiwalay.
“I hope this will be successful. If we can make it work, that’s one Filipino family less with problems in the future,” ani Sen. Alan, na pinagtibay ang kanyang paninindigan na palakasin ang mga pamilyang Pilipino.
Sa kanyang takeaway, binigyang-diin ni Sen. Alan na sa kabila ng pagiging komplikado ng kaso, naging maayos ang pagresolba rito dahil sa isang bagay na pinagsaluhan ng dalawang panig—ang pagmamahal nila sa kanilang anak.
“Naging madali ‘yung ating ‘Case 2 Face’ kahit komplikado ‘yung kaso. ‘Yung common denominator: ‘yung pagmamahal sa anak. Ang hirap talaga ‘pag may nag-aaway lalo kung parehong may punto, parehong may emosyon,” aniya. “Importante ang batas pero mas importante [kung] ano bang pundasyon ang pinag-uusapan at sa pamilya, ‘yung pagmamahal sa anak talaga.”
Sa pamamagitan ng bukas na diskusyon at pagkakaunawaan, patuloy na tinutulungan ng ‘CIA with BA’ ang mas maraming pamilya na harapin ang kanilang mga pagsubok at makahanap ng mga solusyon na inuuna ang kapakanan ng kanilang mga anak.
Ang ‘CIA with BA’ ay ipinagpapatuloy ang legasiya ng yumaong Senador Rene Cayetano at napapanood tuwing Linggo, 11:00 p.m. sa GMA7, na may replays sa GTV tuwing Sabado, 10:30 p.m
