VIRAL SUV CHASE : KAILAN PINAPAYAGAN ANG PULIS NA GUMAMIT NG FORCE?

Viral SUV Chase: Kailan pinapayagan ang pulis na gumamit ng force?

Sa unang episode ng taon ng CIA with BA, tinalakay sa segment na “Tanong ng Pilipino” ang isang viral video kung saan makikitang hinaharang ng mga pulis ang isang SUV na umano’y tumatakas. Sa nasabing video, makikita rin ang pagbabasag ng windshield ng sasakyan, na agad nagbunsod ng diskusyon tungkol sa paggamit ng puwersa ng kapulisan.

Dahil dito, isang manonood ang nagtanong: “Kailan pinapayagan ang pulis na gumamit ng ganitong klaseng pwersa?” Umani ang video ng iba’t ibang reaksyon online, partikular kung lehitimo ba ang naging aksyon ng mga pulis.

Ayon kay Atty. Matt Cesa, nakadepende sa sitwasyon ang paggamit ng puwersa at dapat itong angkop sa banta.

“Kailangan mong gumamit ng force depende sa situation. Kung may danger sa ibang tao, may harm sa sarili mo, ‘di mo magawa ‘yung duty mo, kailangan mong mag-inflict ng commensurate force,” paliwanag niya.

Iginiit naman ni Atty. Rafael Rivera ang prinsipyo ng necessity.

“You may use force as it is necessary,” aniya, sabay sabing ang kilos ng driver sa video ay maaaring ituring na banta na nangangailangan ng agarang aksyon ng kapulisan.

Dagdag pa ni Rivera, base sa nakikitang sitwasyon, makatwiran ang pagpigil sa sasakyan.

“Nakikita natin do’n sa sitwasyon, necessary gumamit ng force… dahil nagpo-pose na ng threat ‘yung pagmaneho niya ng sasakyan,” aniya.

Tinalakay rin ng panel ang posibleng kaso kung mapatutunayang ilegal ang pagkakuha ng sasakyan. Ayon kay Atty. Marian Cayetano, maaaring kasuhan ang driver ng carnapping.

“And then kung meron pong force and intimidation, higher po ang penalty,” paliwanag niya.

Kung may taong nabangga o ari-ariang nasira habang tumatakas ang driver, sinabi ni Atty. Bernadette Maybituin na mahalaga ang intensyon.

“Kung may deliberate intent… pwedeng malicious mischief,” aniya, at idinagdag na kung ito ay dahil sa reckless negligence, maaaring pumasok ang kasong reckless imprudence na may kaakibat na pinsala o kamatayan.

Sa pagtatapos ng talakayan, nagpaalala si Boy Abunda laban sa mabilis na paghuhusga batay lamang sa viral videos.

“We’re so quick to judge base sa ating napapanood sa social media… may tendency tayong gumawa ng sarili nating assumptions,” aniya, na hinikayat ang publiko na unawain muna ang buong konteksto ng bawat insidente.

Ang CIA with BA na pinangungunahan nina Senador Alan at Pia Cayetano at ni Tito Boy ay napapanood tuwing Linggo, alas-11 ng gabi sa GMA7.